Faransiiska ayaa cambaareeyay rabshadaha ka dhanka ah safaaradda uu ku leeyahay Niger, wuxuuna ballan qaaday inuu si adag uga jawaabi doono weerar kasta oo ka dhan ah muwaadiniintiisa ama danihiisa. Dibadbax looga soo horjeedo Faransiiska ayaa maanta ka dhacay afaafka hore ee safaaradda Faransiiska ee Niamey kadib afgambigii militariga ee todobaadkii hore.
"Madaxweynuhu uma dulqaadan doono weerar kasta oo ka dhan ah Faransiiska iyo danihiisa., Xafiiska Madaxweyne Emmanuel Macron ayaa bayaan uu soo saaray ku sheegay in uu ka jawaabi doono weerarrada ka dhanka ah diblomaasiyiinta Faransiiska, ciidamada qalabka sida ama shirkadaha.
Warbixin kale oo ay soo saartay Wasaaradda Arrimaha Dibadda ayaa cambaareysay dhammaan xadgudubyada ka dhanka ah ergada diblomaasiyadeed, waxayna ugu baaqday mas’uuliyiinta Nigeria inay ilaaliyaan howlgalka Faransiiska sida uu qabo sharciga caalamiga ah.
Macron la hadlay madaxweynaha xilka laga qaaday Maxamed Bazoum iyo madaxweynihii hore ee Niger Maxamadou Issoufou saacadihii ugu dambeeyay. Labaduba waxay cambaareeyeen afgambiga, waxayna ku baaqeen in la dejiyo.
Faransiiska oo hore u gumaysan jiray Niger ayaa Sabtidii ku dhawaaqay inuu jaray dhammaan deeqaha horumarineed ee uu siin jiray dalkaas, wuxuuna ku baaqay in Bazoum uu ku soo laabto xafiiska kaddib markii xilka laga tuuray Arbacadii la soo dhaafay. Dalka Niger ayaa waxa ay saaxiibo la ahaayeen Faransiiska iyo Mareykanka oo saldhig ka dhigtay la dagaalanka kooxaha islaamiyiinta ee ka dagaalama gobolka Saaxil ee galbeedka iyo bartamaha Afrika.
Ku soo dhowoow wargeyskayaga!